Column: Lente
Lees hier de column van 18 maart 2025.
Maart is de maand van het dialect. Om dit belangrijke stukje van onze gemeente te herinneren, te bewaren én te gebruiken, schrijf ik deze maand mijn column in dialect. Mijn grote dank gaat uit naar Dini van der Velde van de Oudheidkundige Vereniging De Broeklanden voor haar hulp hierbij.
Wat hebbe wie al geweldige mooie daagn ‘ehad. Ik vin het heerlijk um weer buutn te weez’n. Rommelln in de tuin, buutn te loopn met de hond en kiender weer zien speuln in de wijk. Het is alweer wat langer lich en in de maarn heur ik de veugelties fluitn. Ie kunt markn det het zowat lente is, donderdag alweer!
Det wie oons richting de lente levenslustiger vuult is eigenlijk iets heel natuurlijks. Veur dieren geldt dit ok. Veule dieren bouwt in de lente een nessien en krieg jongen. Of koomp nao een winterslaap weer te veurschien um voedsel te zuukn en zich veur te bereiden op de warmere maondn. Veule dieren wordt ok daodwarkelijk actiever in de warmere maondn, denk an insectn en vogels.
Ik vin het mooi um te zien det wie eigenlijk heel kört bie de natuur staot en det wie daor veule van kunt leern. Veule dieren warkt saamn umme hun doel te bereiken. Of zie past zich an in de umgeving um te overleevn. Ok zie’j det dieren veur mekaare zörgt en mekaare bescharmt. Jaloers bin ik soms wel op het “simpele “ leevn van dieren. Zie bint tevreden met wat ze hebt, met wat er noe is. Zie maakt zich gien zörgen over gistern of maarn. Det mut een fijn gevuul weez’n. Het is ok goed det wie det vermogen wel hebt, en det wie daor iets mee doet.
Det wie wel degelijk iets kunt leern van dieren ontdekkn ik bie een training “Apemanagement“. An de hand van het gedrag van apen en wetenschap, leer ie met zo’n training oe eigen gedrag en det van een ander beter te begriepn. Bliekbaar verschilt de jungle niet zo heel veule met oonze wark- en woonplek. Heel interessant en weerdevol um zo naor situaties te kiekn. Mit oons eigen anpassings- en inlevingsvermogen kunne wie grote verschilln maak’n en een hoop vraogstukken oplössen.
Het is dan ok niet zo gek det online communicatie zörgt veur onduudelijkheid. Ie herkent vaste wel det via Whatsap App of Social Media discussies ontstaot umdet wie mekaare niet goed verstaot. Wie heurt de toon niet van mekaare en ziet de lichaamstaal niet. Dan begriepe wie de bedoeling niet. Det is onhandig en soms zelfs frustrerend. Maar het is daormee ok tegelieke een medium um juust wel te schrievn wat ie denkt en vind umdet het anoniemer is. Ie hoef mekaare niet in de ogen te kiekn. Ie hoef niet te zien hoe a’j die ander raakt. Online platforms wordt daormee soms ok onveilige platforms. As gemeente stelle wie oons zelf dan ok de vraoge hoe wie hiermee umme wilt gaon.
Wat zolln dieren doen, wat zolln apen doen? En hoe is het met de Wifi in de jungle? Het bint mooie overdenkingns veur de lente.
Tanja Haseloop – Amsing
burgemeester